مزاد

ياللا تعالي والحق.. فرصة
عندنا أحلى مزاد يا أخينا
مش بنبيع دايو ولا كورسا
ولا فيللا ولا شاليه في مارينا
بنبيع دولة بكل ما فيها
من أسوان ولغاية سينا
والكل من حقه يشارك
في مزادنا ويتعرف بينا
يعني إذا كنت يهودي اتفضل
أو حتى خواجة رجع لأثينا
بس يا حلو تتقل جيبك
وأوعاك بس تفاصل فينا
وعشان نرتاح بنقول بصراحة
ده مزاد عالي وفل وزينة
يعني نظام الفكة تسيبه
وأساتك ملايين ورينا
وكمان لاحظ حاجة مهمة
مزادنا سريع قوي يا أفندينا
قبل ما يعقل ياللا نبيعه
شعب المحروسة ويشوينا
***
ألا أونه.. ألا دوو.. ألا تريه
بعنا هرمك.. بعنا نيلك.. وشفنا الشاري مين
ما كل شيء بثمن يا حبيبي
حتى ضميرك.. وشرف مامتك.. وضفاير الحلوين
وكمان بعنا شهامة المصري
وأخلاق القرية.. والنكتة إياها بتاعت الميلامين
ولو ذاكرتك جامدة نقوللك
إننا برضه بعنا فطوطة.. والخاطبة.. وهناء وشيرين
وبسكوت بيمبو اتباع بالمرة
وتمثال عرابي.. والمنشية.. وبوكلة وراس التين
وبعنا الغاز لجيراننا البعدا
عشان دباباتهم تفرم في الفلسطينيين
وتوت عنخ آمون بعناه
والتوت والنبوت.. والعار.. واللمبي.. ويوسف شاهين
وبهاء طاهر ويحيي الطاهر
وتوفيق الحكيم وخيري شلبي وصنع الله وصلاح جاهين
أما حليم والست وفوزي
فحاولنا نبيعهم بس يا خسارة طلعوا أصلا متباعين
بس بلاش تزعل وتهنج
عندنا لسه شادية وفوزي ومحيي وتامر وشيرين
وخلاص مش فاضل م الدولة
غير حبة خردة تعبانة.. وكام استوديو.. والمثقفين
ومن البنوك والقطاع العام
بعنا شوية لأخوة صهاينة والباقي للإيطاليين
وإيراد البيع اتحول بره
على مقار العصابة في سويسرا وقبرص وأبردين
***
ليه يا أخينا بتبص دايما
للنص الفاضي والكآبة والضلمة
مصر احلوت لما اتفضت
من كل الدوشة والزحمة
دلوقتي اللي اتبقوا بياكلوا
نجرسكو ومشروم جنب اللحمة
أما اللي اتباعوا فزمانهم
مجلودين بره من غير رحمة
سواء في مكتب في الظهران
أو في دبي في شركة مساهمة
شعب اتحول كله عبيد
طب إيه يعني؟ بطل لخمة
أيام بتدول وبتتدور
ومسيرك ف يوم تهبرلك عكمة