وديانتي مصري

المهنة مصري
وديانتي مصري
ولا عايز أبقى غير بس مصري
لا أرحل وأغادر
ولا يوم أسافر
في ميعاد ولازم أصحاله بدري
ترحل صحابي
تهجر عتابي
ولا مرة أفكر أخلع ف جذري
بغربة أشعر
لسنين وأشهر
وأشوف غياب على مد بصري
لا نيل بيروي
ولا قمر بيضوي
ولا صحبة حلوة تئنس في سهري
الكل واقف
عند المواقف
وسابني وحدي ولا شد أزري
والناس حزينة
ويمكن رزينة
وانا برضه قاعد.. باينني فقري
يقولوا اني
موهوم لأني
شايف أمل قدام بيجري
مع إنه مات
وكمان ساعات
يصحى يقوللي روش وطري
وانفد بجلدك
واجني في سعدك
بلدك بتطرد كمحطة نووي
ولا بحث علمي
على حد علمي
والمخ فيها بقى لحمة بقري
والكوسة ماشية
والصفوة راشية
وانت هنا بتنكت وتهري
ماشي يا سيدي
إيدك ف إيدي
كلامك صحيح ومفعوله سحري
لكن لو إحنا
كلتنا رحنا
مين فينا اللي حيبقى مصري
؟؟؟