لما بنكبر

معاني كتير بتموت جوانا
كل ما نكبر، كل ما نعقل
نفقد لهفة ليلة العيد
نفضل نرزن، نفضل نتقل
نفقد خوفنا ف وسط الضلمة
نفقد حيرة وإنت بتسأل
نكبر، ننسى معنى الحلم
ونخاف نحلم لا الناس تزعل
نبقى في قمة حال الشر
ونوهم روحنا إننا كده أجمل
فجأة نلاقي الوقت بيجري
والقطورات لازم تتحصل
نفقد همس براءة جميلة
والإحساس جوانا بيعطل
نقتل طير راقد على فرخه
جوة الشجرة. وإيه راح يحصل!؟
جوه الدايرة نلف ندور
والدوامة تاخدنا وترحل

لما بنكبر، وأما بنرزن
بتتوه فينا حاجات وحاجات
مش بنداري القسوة ساعات
ولا بنحس الفرحة في يومها
ولا بنشوف قدامنا كتير
والأحلام بتضل طريقها
وكتير منها عمره ما يوصل

نفضل عايشين يوم ورا يوم
بكرة وبعده زي اليوم
هو إمبارح بس المبهج
بنخاف نضحك لحسن نزعج
حتى غنانا بيبقى خفوت
والأيام عمالة تفوت
ونقرب أكتر م الآخر
مش كده أريح؟ مش كده أسهل؟